“గుర్తింపుపేరు”కు “గుణనామానికి” మధ్య భేదం ఏమిటి? | What is the difference between identity name? And attributive name?

What is the difference between identity name And attributive name?

“గుర్తింపుపేరు”కు “గుణనామానికి” మధ్య భేదం ఏమిటి?

సాధారణంగా మనిషి పుట్టీ పుట్టగానే ఏదో ఒక గుర్తింపు పేరు పెట్టడం జరుగుతుంది. దానికి కారణం- లోకంలో ప్రతి మనిషి రంగు, రూపులు ఎత్తు-పొడవులు వేర్వేరుగా ఉన్నప్పటికీ మనుషులందరూ ఒకే విధమైన శరీరాకృతిని కలిగి ఉంటారు కాబట్టి! కనుక ప్రతి వ్యక్తి తాను అనేకులలో ఫలానా అని గుర్తించబడటానికి ఏదో ఒక గుర్తింపు పేరు పెట్టుకోవడం తప్పనిసరి అవుతుంది.  కాబట్టి ప్రతి మనిషికి పుట్టిన వెంటనే మైకేల్, జార్జ్, డేవిడ్, రామ్, అబ్దుల్లా అని ఏదో ఒక గుర్తింపు పేరును అతనికి పెట్టడం జరుగుతుంది

ఒకే విధమైన శరీరాకృతితో భూమిపై ఉన్న అనేకమంది మానవుల మాదిరిగా ఈ సకల సృష్టికి అనేకమంది సృష్టికర్తలైన దేవుళ్ళ సముదాయం లేదు కదా! సృష్టికర్త అయిన దేవుడు ఒక్కడే! ఈ విషయాన్ని అటు వేదోపనిషత్తులు, గీత, బైబిల్, ఖురాన్ గ్రంధాలు ఏకగ్రీవంగా ప్రకటించడమే కాదు శాస్త్రజ్ఞులు సైతం తేల్చి చెప్పేశారు.  అంతేకాదు బైబిల్ మరియు ఖురాన్ గ్రంథాలలో సృష్టికర్త అయిన దేవుడు ఈ క్రింది విధంగా తన గురించి ప్రకటించుకున్నాడు

“ఆయనను పోలిన వస్తువు సృష్టిలో ఏదీ లేదు” - ఖురాన్ 42:11

“నేను దేవుడను నన్ను పోలిన వాడు ఎవడును లేడు” – యెషయా 46:9

పై పరిశుద్ధ వాక్యాలను బట్టి సృష్టికర్త అయిన దేవునిని పోలిన వస్తువు మరొకటి లేదని తెలుస్తుంది.  కాబట్టి మనిషి తాను అనేక మందిలో ఒకడిగా గుర్తించబడటానికి ఏదో ఒక గుర్తింపు పేరును పెట్టుకున్న మాదిరిగా సకల సృష్టిలో ఒకే ఒక్కడైన దేవునికి ఒక గుర్తింపు పేరు అవసరం ఏముంటుంది? ఎందుకంటే ఆయన మనుషుల మాదిరిగా  అనేక మంది దేవుళ్లలో ఒక్కడు కాదు కదా!? ఒకవేళ సృష్టికర్త అయిన దేవుని తో పాటు మరి కొందరు సృష్టికర్తలు ఉండి ఉంటే వారు ఒకరి నొకరు గుర్తించుకోవడానికి లేక పిలుచుకోవటానికి వారిలో ప్రతి ఒక్కరికి ఒక గుర్తింపు పేరు అవసరం అయి ఉండేది! కాబట్టి దేవుడు ఒక ప్రత్యేక గుర్తింపు పేరును కలిగి ఉన్నాడని చెబితే ఆయన లాంటి అనేక మంది సృష్టికర్తలు ఆయనతో పాటు ఉన్నారని కూడా ఒప్పుకోవాల్సి ఉంటుంది.

దేవుడు ఒక ప్రత్యేక "గుర్తింపు పేరు" (IDENTITY NAME) కలిగి ఉన్నాడా? లేక అనేక "గుణనామాలు" (ATRIBUTIVE NAMES) కలిగి ఉన్నాడా?

సృష్టికర్త అయిన దేవుడు మనుషుల మాదిరిగా ఒక ప్రత్యేక గుర్తింపు పేరును కలిగి లేడని ముందు వివరణలో తెలుసుకున్నాము.  అయితే దేవుడు, బైబిల్ మరియు ఖురాన్ గ్రంథాలలో పిలవబడిన అనేక పేర్ల సంగతి ఏమిటి? అంటే అవి- “దేవుడు తన అస్తిత్వాన్ని ప్రజలు గుర్తించటానికి తెలియజేస్తున్న గుణనామాలు మాత్రమే!” ఈ విషయాన్ని అధిక శాతం మంది క్రైస్తవ బోధకులు గుర్తించకపోవడం వలన యెహోవా మరియు అల్లాహ్ వేరు వేరన్న చవకబారు వాదనలు లేవనెత్తడానికి ప్రధాన కారణమైంది.  వారి  అజ్ఞానం చివరకు  యెహోవా మరియు అల్లాహ్ అన్న ఒకే అస్తిత్వానికి చెందిన వేర్వేరు గుణనామాలు, ఇద్దరు దేవుళ్లకు చెందిన వేరువేరు పేర్లన్న అపార్థంలో వారిని పడవేసింది.

యెహోవా మరియు అల్లాహ్ వేరువేరు గుణగణాలు, శక్తి-సామర్ధ్యాలు కలిగిన రెండు అస్తిత్వాలా?

యెహోవా మరియు అల్లాహ్ వేరువేరని నిరూపించటానికి ఏవేవో కారణాలు చూపుతున్న నేటి అభినవ క్రైస్తవ బోధకులు యెహోవా మరియు అల్లాహ్ వేర్వేరు శక్తి-సామర్థ్యాలు కలిగి ఉన్న వేరువేరు అస్తిత్వాలని ఎందుకు నిరూపించలేక పోతున్నారు? అసలు దేవుని పేరు అల్లాహ్ నా? లేక యెహోవానా? అన్న వాదన చేసే ముందు సృష్టికర్త అయిన దేవుని మౌలిక గుణగణాలు ఏమిటి? అన్నవి తెలుసుకోవాల్సి ఉంటుంది అవేమిటంటే-

1. తనతో పాటు తన దైవత్వంలో ఎవరి భాగస్వామ్యం కలిగి లేని వాడు! అంటే “అద్వితీయుడు”

2. సృష్టిలో జంతువులవలె మానవులవలె పుట్టనివాడు అంటే- పుట్టుకలేనివాడు

3. ఆయన ఈ సృష్టిలో ఎవరికి వ్యక్తమవ్వనివాడు అంటే- అగోచరుడు

4. సృష్టిలో ఇతర జీవులవలె నశించనివాడు. అంటే అక్షయుడు లేదా చనిపోనివాడు.

ఒక ప్రక్క నేటి క్రైస్తవులు కన్య మేరీని, యేసును, పరిశుద్ధాత్మను, సిలువను దైవాలుగా చేసుకుని ఆరాధించుకుంటున్నారు.  మరోపక్క అనేక మత వర్గాల వారు తమ మహనీయులను, స్వామీజీలను, బాబాలను, దేవీ దేవతలను ఇతర జీవులను దైవాలుగా భావించి పూజించుకుంటున్నారు.  ఆ విధంగా ప్రజలు తమ అజ్ఞానం కారణంగా ఎంతమందిని దేవుళ్లని ఊహించుకుంటున్నప్పటికీ ఈ విశ్వంలో 1. అద్వితీయుడు 2. పుట్టడు 3. కనిపించడు 4. చనిపోడు అన్న నాలుగు మౌలిక గుణగణాలు  కలిగి ఉన్న ఏకైక అస్తిత్వం మాత్రమే దేవుడు. ఈ  నాలుగు మౌలిక లక్షణాలు కలిగి ఉన్న అస్తిత్వాన్ని ఏ పేరుతో పిలవాలన్నది సమస్య కాదు.  కానీ ఈ మౌలిక లక్షణాలు ఉన్న వానిని మనం దేవునిగా  ఆరాధిస్తున్నామా? లేదా?  అన్నదే అసలు సమస్య.  కాబట్టి సృష్టికర్త అయిన దేవుని అస్తిత్వాన్ని గుర్తించటం అన్నది పేర్లను బట్టి కాదు పై నాలుగు మౌలిక గుణగలను బట్టే మనం నిజ దైవాన్ని గుర్తించాలి.  ఇదే నిజదేవుని గుర్తింపు సూత్రం.

“అద్వితీయుడు, పుట్టడు, కనిపించడు, మరణించడు” అన్న ఈ నాలుగు మౌలిక లక్షణాలు కలిగి ఉన్న ఏకైక అస్తిత్వం ఖురానులో అల్లాహ్ గా, వేదోపనిషత్తులలో సర్వేశ్వరునిగా, భగవద్గీతలో అక్షర పరబ్రహ్మగా, బైబిల్లో యెహోవాగా లేక  ఇలా ఏ భాషలో ఏ పేరుతో పరిచయమైనప్పటికీ  అతనిని దేవునిగా అంగీకరించాల్సిందే! బ్రిటన్లో ఉదయించే “సన్” వేరు భారతదేశంలో ఉదయించే “సూర్యుడు” వేరు అన్న వాదన ఎంత అవివేకమో ఈ నాలుగు మౌలిక లక్షణాలు కలిగిన అల్లాహ్ వేరు, యెహోవా వేరు అనటం కూడా అంతే అవివేకం అవుతుంది.

ఈ నాలుగు మౌలిక లక్షణాలు కలిగిన అస్తిత్వం మాత్రమే దేవుడని అటు హిందూశాస్త్రాలు ప్రకటిస్తున్నప్పటికీ, హిందువులు ఈ నాలుగు మౌలిక లక్షణాలు కలవాడిని అసలు దేవునిగా గుర్తించని కారణంగానే వారిలో దేవుడు అవతరిస్తూ ఉంటాడు, దేవుడు బహుళత్వం కలిగి ఉన్నాడు, వగైరా కల్పిత సిద్ధాంతాలు ఏర్పడి “అనేక దైవారాధన (Polytheism)” ప్రబలిపోయింది.  క్రైస్తవుల పరిస్థితి అంతకంటే మెరుగ్గా ఉందనటానికి అవకాశం లేదు! ఈ నాలుగు మౌలిక లక్షణాలు కలవాడు మాత్రమే దేవుడని పరిశుద్ధ బైబిల్ స్పష్టంగా ప్రకటిస్తున్నప్పటికీ, ఈ నాలుగు మౌలిక లక్షణాలు కలవాడిని నేటి క్రైస్తవులు అసలు దేవునిగా గుర్తించని కారణంగా నేటి క్రైస్తవంలో సైతం దేవుడు ఈ లోకంలో మానవ అవతారంలో దిగిపోయాడని, దేవుడు బహుళత్వం కలిగి ఉన్నాడని, సృష్టికర్త అయిన యెహోవాతో పాటు యేసు, పరిశుద్ధాత్మలు కూడా దేవుళ్లని, కన్యమేరీ దైవాంశ సంభూతురాలనీ వాక్య వ్యతిరేకమైన అన్య సిద్ధాంతాలు ప్రబలిపోయాయి.

యెహోవా మరియు అల్లాహ్ ఒకే అస్తిత్వానికి చెందిన రెండు వేరు వేరు పేర్లు!

అటు బైబిల్లో “నేను తప్ప వేరొక దేవుడు లేడ”ని ప్రకటిస్తున్న యెహోవాయే...

“నేను యెహోవాను నేను తప్ప ఏ దేవుడును లేడు” – యెషయా 45:5

ఖురానులో "నేను తప్ప వేరొక దేవుడు లేడ"ని ప్రకటిస్తున్న అల్లాహ్!

“నేనే అల్లాహ్ ను నేను తప్ప మరొక దేవుడు లేడు” –ఖురాన్ 20:14

అటు బైబిల్లో “నర పుత్రుడు కాడ”ని పరిచయమవుతున్న యెహోవాయే...

“దేవుడు అబద్దమాడుటకు ఆయన మానవుడు కాడు పశ్చాత్తాప పడుటకు ఆయన నర పుత్రుడు కాడు” –సంఖ్యా 23:19

ఖురానులో “ఎవరి సంతానమూ కాద”ని పరిచయమవుతున్న అల్లాహ్!

“ఆయనకు సంతానం ఎవరూ లేరు ఆయన ఎవరి సంతానమూ కాదు” – ఖురాన్ 112:3, 4

అటు బైబిల్లో “అగోచరుడు” అని పరిచయమవుతున్న యెహోవాయే...

“సర్వశక్తుడగు దేవుడు మహాత్మ్యము గలవాడు.  ఆయన మనకు అగోచరుడు” – యోబు 37:23 

ఇటు ఖురానులో “అగోచరుడు” అని పరిచయం అవుతున్న అల్లాహ్!

“చూపులు ఆయనను అందుకోలేవు ఆయన చూపులను అందుకుంటాడు” – ఖురాన్ 6:103

అటు బైబిల్లో “నాశనం లేని వాడ”ని పరిచయమవుతున్న యెహోవాయే...

“అక్షయుడును అదృశ్యుడునగు దేవునికి ఘనతయు మహిమయు యుగయుగములు కలుగును గాక” – 1 తిమోతి 1:17

ఇటు ఖురానులో  నాశనం లేని వాడని పరిచయమవుతున్న అల్లాహ్!

“ఒక్క ఆయన ఉనికి తప్ప ప్రతిదీ నశించేదే” – ఖురాన్ 28:88

పై పరిశుద్ధ బైబిల్ మరియు ఖురాన్ వాక్యాల వెలుగులో ఒకే మౌలిక గుణగణాలు కలిగిన “యెహోవాయే అల్లాహ్” అన్న విషయం తేటతెల్లమైంది.  నేటి సువార్తికులు వాదిస్తున్నట్టు ఒకవేళ బైబిల్లో యెహోవా, ఖురానులో అల్లాహ్ రెండు వేరు వేరు అస్తిత్వాలే అయితే, ఆ రెండు అస్తిత్వాలకు చెందిన గుణగణాలు సైతం వేరు వేరుగానే  ఉండేవి! “సన్” వేరు “సూర్యుడు” వేరు  అని కూడా చెప్పవచ్చు!! కానీ సూర్యుని గుణగణాల కనీస అవగాహన కలిగి ఉండేవాడు ఎవడైనా అవి ఒకే పదార్థానికి చెందిన వేరు వేరు పేర్లు అనే చెబుతాడు.  కాబట్టి యెహోవా వేరు, అల్లాహ్ వేరని వాదించే వారు ముందు సృష్టికర్త అయిన దేవునికి చెందిన మౌలిక గుణగణాలు ఏమిటో తెలుసుకుంటే యెహోవా-అల్లాహ్ అన్నవి రెండు వేరు వేరు అస్తిత్వాలు కావు! కానీ, ఒకే  అస్తిత్వానికి చెందిన రెండు వేరు వేరు భాషలలో అనువదించబడిన పేర్లు అన్న విషయాన్ని తెలుసుకోవడానికి పెద్ద సమయం పట్టదు.

భాషను బట్టి గుర్తింపు పేరు మారుతుందా లేక గుణ నామము మారుతుందా?

యెహోవా వేరు, అల్లాహ్ వేరని వాదించే నేటి క్రైస్తవ పండితుల వాదన ఏమిటంటే- మనిషి పేరు భాష భాషకు ఎలా అయితే మారదో, అలాగే దేవుని పేరు కూడా భాష భాషకూ మారిపోదు! బైబిల్లో “యెహోవా” అన్న పేరు ఖురాన్ లోకి వచ్చేసరికి అల్లాహ్ గా  ఎలా మారిపోతుంది? అన్నది.

ఇలా వాదించేవారు గమనించాల్సింది-  కొత్తనిబంధనను అరమాయిక్, మరియు అరబ్బీ భాషలలో అనువాదం చేసినప్పుడు యెహోవా అన్న హెబ్రూ పదాన్ని అల్లాహ్ అని ఎందుకు అనువదించారు? అన్న ప్రశ్నలకు సమాధానం చెప్పాలి.  ముఖ్యంగా ఎక్కడెక్కడైతే హెబ్రూ మూలంలో యెహోవా అని ఉందో అక్కడ హిందీ బైబిల్లో “పరమేశ్వర్” అని అనువదించబడినట్లు చూడగలం.

మనుషులకు చెందిన గుర్తింపు పేర్లు భాష భాషకు మారవు! నిజమే! కానీ సృష్టిలో అందరికీ చెందిన లేక విశ్వవ్యాప్తమైన పదార్థాల పేర్లు వాటి గుణగణాలు ప్రజలు మాట్లాడుకునే భాషకు తగినట్లుగా మారిపోతాయి.  ఉదాహరణకు ఇంగ్లీషులో “సన్” ను తెలుగులో “సూర్యుడు” అని పిలుచుకుంటారు. దాని గుణమైన “హీట్” ను  తెలుగులో “వేడిమి” అంటారు.  అలాగే సృష్టిలో భూమి, నీరు, గాలి, అగ్ని వగైరా  విశ్వవ్యాప్తంగా సర్వమానవాళికి చెందిన ఉమ్మడి పదార్థాల పేర్లు వాటి గుణగణాలు భాష భాషకూ  మారిపోతాయి. అలాగే దేవుని ఉనికి  విశ్వవ్యాప్తమైంది మరియూ అందరికీ చెందినది కాబట్టి దేవుని పేర్లు అంటే ఆయన గుణనామాలు ప్రజలు మాట్లాడుకునే భాషను బట్టి మారిపోతాయి.

అందుకే సృష్టికర్తయైన దేవుడు ప్రజలు మాట్లాడుకునే భాషను బట్టి యెహోవాగా, అరబ్బీలో అల్లాహ్ గా, వేదాల్లో సర్వేశ్వరుడిగా  ఇంకా అనేక భాషల్లో అనేక పేర్లతో పరిచయమయ్యాడు.  కాబట్టి భాషను బట్టి మారనివి  మనుషుల గుర్తింపు పేర్లు (IDENTITY NAMES) మాత్రమే! కానీ భాషను బట్టి మారనివి- విశ్వవ్యాప్తమైన పదార్థాల పేర్లు మరియు వాటి గుణగణాలు అన్న విషయాన్ని ప్రతి ఒక్కరూ దృష్టిలో ఉంచుకోవాలి.

(సేకరణ: "యెహోవా యే అల్లాహ్" పుస్తకం నుండి)

Md Nooruddin